GHT BAŞI Anna HARLAMENKOnun KONGRESTÄ KONUŞMASI

GHT BAŞI Anna HARLAMENKOnun KONGRESTÄ KONUŞMASI

Mesajgönderen Türker tarih *** Eki 11, 2013 8:44 pm

GHT BAŞI Anna HARLAMENKOnun KONGRESTÄ KONUŞMASI


Paalı gagauzlar! Hoş geldiniz evä!
Saygılı musaafirlär! Gagauzların dünnä Kongresinä hoş geldiniz!

Bütün üreklän kutlêêrım sizi Gagauz Avtonomiya Bölgesindä, Gagauz Erinin baş kasabasında, Komratta! Bizim gagauz aylemiz bugün çok zenginnedi hem zeedelendi – bütün dünnedän gagauzlar kendi evinä çekildi. Saa olunuz!
Bu toplantı faydalı geçsin, konuşmaklar saygılı olsun!

Moldova Vatanında 120 tane halk yaşêêr. Onnarın biri – gagauzlar! Millionnar insan arasında bizim halkımız kendisini kaybetmedi, adını, dilini, adetlerini, dinini korudu. 1990-ıncı yılda gagauzlar kendi Respublikasını kurdu, 1994-düncü yılda da kendi Avtonomiyasını kabletti.

Bizim Gagauziyamiz adım-adım ayaa kalkêr. Aramızda kavga da, küsü dä olêr, ama herbirinä halkımız arka kalkêr. Kim aşırı devletlerä işlemää gider, onnar da kendi topraanı, anasını-bobasını, istoriyasını hem dilini unutmêêr.
Büük sayıda halkların arasında küçük sayıda zor olmaa, ama gagauzlar verilmeerlär. Herbir gagauzun üreendä çancaaz öter. O çancaazların sesini bütün dünnä işitti da üürendi, ani biz bu er üzündä taa varız. Bizi tanıyêrlar artık, ama bizim için taa az bilerlär.

Nereyi dä gittim, hererdä sorêrlar bizim istoriyamız, kulturamız, adetlerimiz için. İnsan isteer derindän üürenmää, kim o gagauzlar. Pek islää, ani bu Kongres var, ani o dünnenin hertarafında yaşayan gagauzları tanıştırêr hem birleştirer. Ama lääzım taa çok çalışmaa, kaavi olunca. Çalışmaa annaşmakta, kötüsüz, kavgasız, bütün halkın adından.
İleri dooru nelär lääzım yapmaa, bu dostluk, bu annaşmak kopmasın deyni? Kendi uygularımnan paylaşacam.

1. Kultura hem halkın temeli.
Gagauzların kulturasını lääzım toplamaa hem korumaa. Teklif ederim Komratta bütün dünnä gagauzların bir Kultura evini açmaa. İslää olur gagauzların yaşadıı devletlerindä dä bir parça er
bunun için bulunsun.
Bu yıl bän Ukrainanın Tarutino kasabasına gittim. Pek sevindim. Orada gagauzlar büük sayıda ukrain halkın arasında kaybelmemiş.

2. Dil – halkın sesi.
Ama bu ses kam-kam yavaşlêêr. Allaa korusun dünnedän kaybelenneri! Dedelerimiz, analarımız, bobalarımız bizim dilimizi korumuşlar, biz dä lääzım onu koruyalım, zenginnedelim, gelän evladboylara hep bölä gözäl etiştirelim.
Bu yıl bizim Halk Topluşumuz ilk sıra başladı kanunnarı gagauz dilindä kabletmää. Grigoriy Morar deputatlara gagauz dilindä büjeti annattı. Gagauz Parlamentinin eni dönemi, angısı diil çoktan seçildi da çalışmaa başladı, inanêrım, ani bu işleri ileri dooru da götürecek.
Şindi birkaç laf gagauz dilindä gazetamız için. Bän hem Nikolay Telpşz başladık buyıl onu kendi paramızlan tiparlamaa. “Gagauzlar” gazetası ana dilimizdä yarım yıl çıktı. İsteerim bu gazeta devlet gazetası olsun.
Okullarda da lääzım gagauz dilimiz taa sık işidilsin. Korumaa halkın sesini hem dilini – bizä baalı.

3. İstoriya – halkın pençeresi.
Bu pençerä bizdä biraz kapanık taa. Kendi istoriyamızı derindän taa bilmeeriz. Yılın başında Halk Topluşun deputatları Türkiyanın Prezidentinnän, Premyer Bakanınnan, Meclis Başkanınnan buluştular. Vizadan hem ekonomikadan kaarä biz gagauzların istoriyası için dä lafettik. Teklif var: barabar bir istoriya grupasını kurmaa da arhivlerin materiallarını üürenmää.

4. Adetlär – halkın üzümcüü.
Gagauzların adetlaei gözäl, şafklı, tatlı. Dimitri Kara Çoban, bizim gagaz legendamız, Beşalma küüyündä gagauzların evelki düünnerini, türkülerini, horularını, derneklerini kameraya çıkardı. Şindi eni kameralar var, ama Kara Çoban yok. TRTda, Türkiyada, hazır yardımcılar, kimin neeti var – yaklaşsın. Yapalım bir büük gözäl film: “Gagauzların özel adetleri”.

5. Ekonomika hem politika soruşları.
İşimiz taa çok var, Gagauz Avtonomiyasında yaşamak düzelincä, ama hepsi insannar inanêrlar, ani birliktä, annaşmakta hem akıllan çalışarkan, hepsi islää olacek.
Sizinnän, nicä ayledä, lafettim. Açılsın ürekleriniz isteerim, da birliktä işlerimizi yapalım. Herzaman evinizä gelin, burada sizin topraanız, Vatanınız, burada sizi severlär, annêêrlar, bekleerlär.


Türker
Site Admin
 
Mesajlar: 370
Kayıt: Sal Ağu 27, 2013 9:02 am
---------

Dön Haberlär

Kimler çevrimiçi

Bu forumu gezen kullanıcılar: Hiç bir kayıtlı kullanıcı yok ve 0 misafir

cron